O Ministerio de Ciencia, Innovación e Universidades vén de publicar (BOE 29/10/2025) a Resolución da Presidencia da Agencia Estatal de Investigación pola que se aproba a convocatoria de tramitación anticipada, correspondente ao ano 2025, das axudas Ramón y Cajal, no marco Programa Estatal de Recursos Humanos do Plan Estatal de Investigación Científica, Técnica e de Innovación para o período 2024-2027.

O obxectivo destas axudas é promover a incorporación de persoal investigador doutor, español e estranxeiro, cunha traxectoria destacada, en centros de I+D españois, co fin de que adquiran competencias e capacidades que lles permitan obter un posto de carácter estable nun organismo de investigación do Sistema Español de Ciencia, Tecnoloxía e de Innovación.

As axudas concederanse aos centros de I+D para a contratación de persoal investigador doutor durante cinco anos que estará dividida en dúas fases:

A primeira fase, dunha duración mínima de tres anos, terá como obxectivo afianzar as capacidades adquiridas durante a primeira etapa previa de formación posdoutoral. Neste período a retribución mínima será de 36.720 euros anuais.

A segunda fase terá unha duración máxima de dous anos e para acceder a ela será necesario obter unha avaliación positiva como persoal investigador R3. Durante este período a duración mínima será de 43.400 euros anuais.

As axudas contemplan unha financiación adicional para a execución da actividade investigadora de 50.000 euros que poderán chegar a 100.000 no caso de obter unha axuda  para a atracción de talento para executar durante todo o período da axuda.

Poderán presentar declaración de interese en acoller persoal investigador doutor seleccionado mediante a convocatoria «Ramón y Cajal 2025» os grupos de investigación de calquera ámbito de coñecemento única e exclusivamente, tendo preferencia as solicitudes dos grupos integrados en centros e institutos de investigación de calquera ámbito de coñecemento.

Un mesmo grupo de investigación pode ofertar máis dun perfil, aínda que no proceso de selección a Comisión de Investigación da Universidade de Vigo, á vista do conxunto de solicitudes presentadas e dos méritos dos grupos, poderá limitar o número de perfís autorizados.

- Formulario de declaración de interese correspondente.

- Compromiso de acollida por parte do departamento.

1. Encher o formulario interno correspondente e a conformidade do departamento que se publican xunto con estas instrucións  e  son accesibles no taboleiro de convocatorias da Universidade de Vigo.
2. Presentar antes do 21 de novembro de 2025 ás 14.00 horas, o formulario asinado dixitalmente por todas as persoas necesarias xunto coa conformidade do departamento pola sede electrónica da Universidade de Vigo mediante unha instancia xenérica SXER dirixida ao Servizo de Recursos Humanos de Investigación.