A presente convocatoria está prevista no Plan estratéxico de subvencións da Universidade de Vigo como unha acción destinada a cumprir co obxectivo 26 “captar estudantado con talento e garantir o acceso universal á educación pública universitaria” a través de recoñecer e incentivar ao estudantado con aproveitamento académico excelente nos másters universitarios que se detallan de seguido.

Convócanse:

• 1 premio no máster en Dirección e Planificación do Turismo Interior e da Saúde
• 3 premios no máster en Estudos Ingleses Avanzados e as súas Aplicacións
• 2 premios no máster en Lingüística Aplicada
• 2 premios no máster de Tradución Multimedia

Pode participar nesta convocatoria o estudantado que cumpra os seguintes requisitos:

1. Posuír nacionalidade española, nacionalidade comunitaria acreditando a residencia continuada, ou de fóra da UE acreditando a residencia legal en España no prazo de presentación de solicitudes (non é suficiente o permiso de estadía por estudos).
2. Estar matriculado na Universidade de Vigo no curso 2025/2026 nalgún dos seguintes másters universitarios:

• Dirección e Planificación do Turismo Interior e da Saúde
• Estudos Ingleses Avanzados e as súas Aplicacións
• Lingüística Aplicada
• Tradución Multimedia

Presentar e superar o Traballo fin de máster no curso 2025/2026, e en todo caso antes do 7 de setembro de 2026, data límite de entrega de actas.

As persoas solicitantes deberán cubrir o formulario en liña no seguinte enlace https://secretaria.uvigo.gal/uv/web/bolsas/convocatorias/index “Premios mellores cualificacións másters”.

 O prazo de presentación das solicitudes comeza o día seguinte a publicarse esta convocatoria e finaliza o 15 outubro de 2026 ás 23:59 horas (hora peninsular española).

De non ter nacionalidade española deberán subir a documentación que corresponda en cada caso:

• No caso de estudantado comunitario deberá presentar documento do Rexistro de cidadán/á da Unión Europea
• No caso de estudantado extracomunitario deberá presentar a tarxeta de identificación de estranxeiro/a na que conste o permiso de residencia (non é suficiente co permiso de estadía por estudos).

No caso do Máster en Dirección e Planificación do Turismo Interior e da Saúde, xunto coa solicitude deberán subir a seguinte documentación:

• Currículo relacionado cos estudos (cursos e seminarios acreditativos de coñecementos relacionados co plan docente do máster, actividade profesional no ámbito turístico, outras actividades) e acreditación dos mesmos.