OBXECTO

O obxecto desta convocatoria é establecer unha conexión entre os traballos de fin de grao (TFG) e/ou traballos de fin de máster (TFM) do estudantado da Universidade de Vigo e os retos reais propostos por empresas, proxectos de emprendemento ou iniciativas empresariais emerxentes da nosa comunidade autónoma.

A través do Programa Colmea de Ideas, búscase que o estudantado desenvolva, aplique e demostre os coñecementos, capacidades e competencias adquiridas ao longo da súa formación académica mediante a elaboración do seu TFG ou TFM, contribuíndo con solucións ou melloras a necesidades concretas das entidades participantes.

A colaboración terá un carácter formativo e deberá cumprir coa normativa interna da Universidade de Vigo sobre traballos de fin de estudos, así como coas cláusulas do convenio específico de colaboración asinado para tal fin.

Establécense dúas modalidades en función das características das entidades, cun máximo de 9 bolsas en cada unha delas:

• Modalidade A: bolsas que se desenvolvan en iniciativas empresariais emerxentes ou proxectos emprendedores, tanto os vinculados á Rede de Polos de Emprendemento e apoio ao emprego da Xunta de Galicia como aqueles nados no seo da Universidade de Vigo.
• Modalidade B: bolsas que se desenvolvan en empresas ou entidades xa consolidadas.

Pode solicitar a bolsa o estudantado que cumpra os seguintes requisitos:

1. Atoparse nalgún dos seguintes casos no prazo de presentación de solicitudes
   • Posuír nacionalidade española.
   • Posuír a nacionalidade dun estado membro da Unión Europea e acreditar a condición de residente legal.
   • Posuír nacionalidade fóra da UE e acreditar a residencia legal en España, de acordo co disposto na normativa sobre dereitos e liberdades dos estranxeiros en España (non é suficiente o permiso de estadía por estudos).
2. Estar matriculado na Universidade de Vigo na materia de TFG/TFM no curso 2026/2027 na data fin do prazo de presentación de solicitudes.
3. Estar rexistrado como estudante na plataforma Colmea de Ideas https://colmeadeideas.webs.uvigo.es/register?profile=student e estar seleccionado/a pola empresa promotora do proxecto elixido para desenvolvelo no marco do seu TFG/TFM ao longo do curso académico 2026/2027.

1. A solicitude realizarase a través do formulario en liña dispoñible na Secretaría virtual da Universidade de Vigo https://secretaria.uvigo.gal/uv/web/bolsas/convocatorias/index na que deberá rexistrarse e seleccionar “TFG/TFM Colmea de ideas”

2. O prazo de presentación das solicitudes comeza o día seguinte de publicarse esta convocatoria e remata o 15 de setembro do 2026 ás 23:59 horas (hora peninsular española).

3. No formulario en liña achegarase, de ser o caso, a seguinte documentación:

O estudantado que non teña nacionalidade española:

• documento do Rexistro de cidadán/á da Unión Europea ou
• tarxeta de identificación de estranxeiro/a na que conste o permiso de residencia (non é suficiente co permiso de estadía por estudos) de cidadán/á extracomunitario.

No caso do estudantado procedente do sistema de protección á infancia e adolescencia deberá presentar certificado expedido polo órgano competente da comunidade autónoma.

Tamén se lles poderá requirir que acheguen outra documentación que sexa necesaria para a correcta avaliación de requisitos e méritos alegados.

O feito de non achegar a documentación requirida será causa de exclusión.

OBRIGAS

Son obrigas das persoas bolseiras:

1. Contemplar, no desenvolvemento da estadía ás obrigas recollidas na normativa para a realización de Traballo Fin de Grao e Fin de Máster (aprobada no Consello de Goberno o 15 de xuño de 2016, modificada o 13 de novembro de 2018 e o 31 de outubro de 2022).
2. Cumprir os contidos da colaboración seguindo as indicacións da persoa titora asignada pola entidade participante baixo a supervisión da persoa da universidade que exerza a dirección do traballo. Así mesmo deberán manter contacto co/a director/a académica e comunicarlle calquera incidencia que exista durante o desenvolvemento da colaboración.
3. Incorporarse á entidade na data acordada.
4. Enviar á Sección de Bolsas, dentro do mes seguinte á finalización da bolsa, un documento de fin de bolsa asinado polas persoas titoras da entidade e da universidade, a través do seguinte formulario
5. Comunicar á Sección de Axudas e Bolsas a obtención de axudas da mesma natureza e finalidade.