OBXECTO

A presente convocatoria está prevista no Plan estratéxico de subvencións da Universidade de Vigo para o ano 2026 como acción destinada ao cumprimento do obxectivo 2 “ Desenvolver programas formativos conxuntos coas empresas e coas institucións que melloren a empregabilidade do estudantado”, a través do fomento da excelencia académica e investigadora en áreas clave para o desenvolvemento tecnolóxico e empresarial.

Convócanse 3 premios:

• 1 premio ao mellor TFG
• 1 premio ao mellor TFM
• 1 premio a mellor Tese de doutoramento

A contía individual dos premios será:

• mellor TFG cun importe de 500€
• mellor TFM cun importe de 800€
• mellor Tese de doutoramento cun importe de 1.250€

Esta contía está suxeita á retención de IRPF que estableza a normativa vixente nesta materia.

Poderá participar o estudantado que cumpra os seguintes requisitos:

1. Atoparse nalgún dos seguintes casos:
   • Posuír nacionalidade española.
   • Posuír a nacionalidade dun estado membro da Unión Europea e acreditar a condición de residente legal.
   • Posuír nacionalidade fóra da UE e acreditar a residencia legal en España, de acordo co disposto na normativa sobre dereitos e liberdades dos estranxeiros en España (non é suficiente o permiso de estadía por estudos).

a) Presentar un TFG, TFM ou TD aliñado coas liñas de interese da Cátedra: sistemas de antenas, simulación electromagnética, radar, satélite, fotónica, cuántica, intelixencia artificial aplicada a comunicacións, redes 5G/6G e radiocomunicacións en xeral.

b) No caso dos premios TFG TFM: deberá cumprir os seguintes requisitos adicionais:

1. Superar o TFG ou TFM na Universidade de Vigo entre o 1 de xullo de 2025 e o 31 de agosto de 2026 nalgunha das seguintes titulacións:

1. Grao en Enxeñería de Tecnoloxías de Telecomunicación
2. Grao en Enxeñería Aeroespacial
3. Máster Universitario en Enxeñería de Telecomunicación
4. Máster Universitario en Ciencia e Tecnoloxías da Información Cuántica
5. Máster Internacional en Visión por Computador
6. Máster Universitario en Enxeñería Aeronáutica
7. Máster Universitario en Sistemas Aéreos non Tripulados

2. Ter nota media expediente igual ou superior a 7.
3. Obter unha cualificación do TFG ou TFM igual ou superior a 7.

c) No caso dos premios a tese de doutoramento deberá cumprir os seguintes requisitos adicionais:

1. Defender e superar a tese de doutoramento na Universidade de Vigo entre o 1 de xullo de 2025 e o 31 de agosto de 2026 nalgún dos seguintes Programas de doutoramento:
   • Tecnoloxías da Información e as Comunicacións
   • Tecnoloxía Aeroespacial Enxeñarías Electromagnética, Electrónica, Informática e Mecánica
   • Láser, Fotónica e Visión
   • Métodos Matemáticos e Simulación Numérica en Enxeñaría e Ciencias Aplicadas
2. Cualificación na tese de sobresaínte.

Non poderán ter a condición de beneficiario/a as persoas nas que concorra algunha das circunstancias establecidas no artigo 13.2 da Lei 38/2003 xeral de subvencións, de 17 de novembro.

1. As persoas solicitantes deberán cubrir o formulario en liña dispoñible na Secretaría Virtual da Universidade

https://secretaria.uvigo.gal/uv/web/formularios/encuesta/cubrir_paso1/15480

 descargalo e presentalo na Sede Electrónica da Universidade de Vigo (https://sede.uvigo.gal) a través da Instancia Xenérica (SXER) existente na sede, e pór como asunto “Premios cátedra Oesía”, achegando unicamente o formulario coa solicitude.

O modelo específico de presentación de solicitudes é de uso obrigatorio para os interesados/as neste procedemento (artigo 66.6 da Lei 39/2015 do 1 de outubro, do procedemento administrativo común das administracións públicas). Se algunha das persoas interesadas presenta a súa solicitude de xeito presencial, solicitarase que a presente de xeito electrónico.

2. O prazo de presentación de solicitudes comezará o día seguinte a publicarse esta convocatoria, finalizando o 28 de setembro de 2026 ás 23:59 horas (hora peninsular española).
3. No formulario en liña achegarase a seguinte documentación (non hai que subir a documentación á sede electrónica):
   1. Resumo do traballo (máximo 600 palabras), explicando a súa relevancia para as liñas de interese da convocatoria.
   2. Descrición do impacto alcanzado (difusión en medios, publicacións, transferencia).
   3. Copia en formato pdf do TFG, do TFM ou da TD
   4. Informe da persoa directora do traballo/tese de doutoramento acerca do cumprimento do requisito de que a temática do traballo ou tese está relacionado coas liñas de interese da cátedra.
4. O estudantado que non teña nacionalidade española:
   • documento do Rexistro de cidadán/á da Unión Europea.
   • tarxeta de identificación de estranxeiro/a na que conste o permiso de residencia (non é suficiente co permiso de estadía por estudos) de cidadán/a extracomunitario.

Tamén se lles poderá requirir que acheguen outra documentación que resulte necesaria para a correcta avaliación de requisitos.

O prazo de presentación de solicitudes comeza o día seguinte a publicarse esta convocatoria e finaliza o 28 de setembro de 2026 ás 23:59 horas (hora peninsular española).