OBXECTO

A presente convocatoria está prevista no Plan Estratéxico de Subvencións da Universidade de Vigo como acción destinada ao cumprimento do obxectivo “captar estudantado con talento e garantir o acceso universal á educación pública universitaria”, a través do fomento da participación do estudantado en proxectos e eventos de carácter cultural, científico, de especialización ou perfeccionamiento que complementen a súa formación académica.

Establécense 3 modalidades en función da súa finalidade:

• Modalidade A: Axudas para a realización de viaxes e visitas colectivas de interese académico que lles sirvan para adquirir competencias e coñecementos relacionados co ámbito curricular da súa titulación, quedando excluídas as viaxes para a participación en competición realizadas a través dunha asociación.
• Modalidade B: Axudas para a participación e/ou presentación de comunicacións en congresos, reunións científicas, seminarios, debates e outras actividades de interese académico tanto na modalidade presencial como en liña, incluíndo así mesmo a realización de cursos organizados por entidades públicas relacionados co ámbito curricular da súa titulación tanto na modalidade presencial como en liña.
• Modalidade C: Axudas para a realización colectiva de proxectos e actividades culturais, científicas ou de difusión de interese para a comunidade universitaria.

Quedarán excluídas da presente convocatoria as prácticas externas curriculares e extracurriculares, as actividades relacionadas coa participación en programas de mobilidade tanto nacional como internacional, os cursos de idiomas, e os cursos de formación permanente da Universidade de Vigo.

Poderán solicitar bolsa o estudantado que cumpra os seguintes requisitos:

a) Atoparse nalgún dos seguintes casos no prazo de presentación de solicitudes

• • Posuír nacionalidade española.
  • Posuír a nacionalidade dun estado membro da Unión Europea e acreditar a condición de residente legal.
  • Posuír nacionalidade de fóra da UE, e acreditar a residencia legal en España, de acordo co disposto na normativa sobre dereitos e liberdades dos estranxeiros en España (non é suficiente o permiso de estadía por estudos).

b) Estar matriculado/a no curso 2025/2026 en titulacións oficiais de grao ou máster universitario en centros propios, ou en centros adscritos de titularidade pública que imparten titulacións oficiais non impartidas en centros propios (Enfermaría Ourense, Enfermaría Pontevedra e Enfermaría Meixoeiro).

c) Estar matriculado no curso 2025/2026 dun mínimo de 45 créditos ou do máximo que lle permita a normativa da Universidade de Vigo.

d) Presentar unha proposta de actividade realizada ou a realizar entre o 1 de setembro de 2025 e o 31 de outubro de 2026 (Anexo II), das descritas no punto 1 desta convocatoria, a cal deberá iniciarse antes do 1 de setembro do 2026.

e) Contar co informe favorable do/a decano/a ou director/a do centro no que o/a estudante realice os estudos.

1. A solicitude realizarase a través do formulario en liña dispoñible na secretaría virtual da Universidade https://secretaria.uvigo.gal/uv/web/bolsas/convocatorias/index  / Bolsa actividades de carácter formativo.

2. O prazo de presentación das solicitudes comeza o día seguinte a publicarse esta convocatoria , rematando o 2 de xuño de 2026 ás 23:59 horas (hora peninsular española).

3. No formulario en liña achegarase a seguinte documentación:

• O estudantado que non teña nacionalidade española:
  • documento do Rexistro de cidadán/á da Unión Europea ou
  • tarxeta de identificación de estranxeiro/a na que conste o permiso de residencia (non é suficiente co permiso de estadía por estudos) de cidadán/á extracomunitario.
• Descrición da proposta de actividade para a que solicita a bolsa segundo o modelo do anexo II: o detalle da actividade a realizar, o lugar de destino, a institución ou entidade de destino, a duración da actividade, o contido e obxectivo formativo da actividade, que deberá contar co informe favorable do/a decano/a ou director/a do centro no que a persoa solicitante realice os estudos.
• No caso do estudantado procedente do sistema de protección á infancia e adolescencia deberá presentar certificado expedido polo órgano competente da comunidade autónoma.

O prazo de presentación das solicitudes comeza o día seguinte a publicarse esta convocatoria e rematará o 2 de xuño de 2026 ás 23:59 horas (hora peninsular española).