Obxecto:

O obxecto desta convocatoria é apoiar as ideas emprendedoras que xurdan entre o estudantado e persoas recentemente tituladas pola Universidade de Vigo co fin de fomentar o espírito emprendedor e impulsar as habilidades e competencias emprendedoras entre a comunidade universitaria.

Axuda:

A axuda consiste na formación e titorización do equipo emprendedor durante un período de pre -incubación dun máximo de 6 meses. Estas accións irán encamiñadas a elaborar un modelo de negocio das ideas presentadas.

Seleccionaranse como máximo 12 proxectos, os cales poderán desenvolverse en calquera dos tres campus da Universidade de Vigo (Ourense, Pontevedra ou Vigo) e abranguer todas as áreas de coñecemento: enxeñaría e arquitectura, ciencias e ciencias da saúde, ciencias sociais e xurídicas e artes e humanidades.

1. Os MEMBROS DOS EQUIPOS promotores das ideas deberán pertencer a algún dos seguintes colectivos:

• Estudantado matriculado na Universidade de Vigo en estudos de Grao ou Máster universitario no curso 2025/2026.
• Persoas tituladas en titulacións oficiais pola Universidade de Vigo no curso 2022/2023 ou posteriores.
• Estudantado matriculado en titulacións oficiais ou persoas tituladas doutras universidades españolas no curso 2022/2023 ou posteriores, sempre que estes non superen o 50% dos membros do equipo

2. A IDEA EMPRENDEDORA poderá presentarse de maneira individual ou en equipo de 4 persoas como máximo; neste último caso existirá unha persoa que actuará como coordinadora do equipo. A persoa ou equipo promotor deberá posuír a autoría intelectual das ideas que presentan ou, no seu defecto, dispor dos permisos correspondentes de uso da propiedade intelectual e/ou industrial de terceiros.

3. Non se admitirán proxectos presentados por grupos nos que algún dos membros fose premiado en anteriores convocatorias de INCUVI.

4. Non se poderá presentar mais dun proxecto nin pertencer a varios equipos emprendedores.

Presentación de solicitudes e documentación:

1. A persoa promotora ou a persoa coordinadora do equipo deberá encher o formulario en liña no seguinte enlace:

https://secretaria.uvigo.gal/uv/web/formularios/encuesta/cubrir_paso1/14862, descargalo e presentalo na sede electrónica da Universidade de Vigo (https://sede.uvigo.gal) a través da instancia xenérica (SXER) existente na sede, poñendo en asunto “Axudas INCUVI Emprende”, achegando unicamente o arquivo coa solicitude.

2. O prazo de presentación das solicitudes será desde o día seguinte a publicarse esta convocatoria ata o 10 de decembro de 2025 ás 23:59 horas (hora peninsular española).
3. As persoas participantes deberán subir a seguinte documentación ao formulario en liña (non hai que subir a documentación á sede electrónica):

• Breve CURRÍCULO de todas as persoas integrantes do equipo emprendedor (máximo 1 cara tamaño A4) no que indiquen formación, experiencia e outra información considerada de utilidade para reforzar a súa candidatura.
• VIDEO AUTOEDITABLE (máximo 3 minutos de duración) no que se expoñan as liñas principais do proxecto presentado.
• No caso do estudantado matriculado en titulacións oficiais ou persoas tituladas doutras universidades españolas, DOCUMENTACIÓN XUSTIFICATIVA DA MATRÍCULA ou do título correspondente.
• OUTRA DOCUMENTACIÓN complementaria que consideren oportuno achegar.

Obrigas

As persoas beneficiarias da axuda deberán:

• Colaborar coas accións e actividades de promoción e difusión do programa.
• Cumprir cos prazos marcados pola universidade para a entrega da información requirida.
• Entregar toda a información adicional requirida ao longo da vixencia do programa.
• Asistir e participar de forma activa en todas as accións do programa. Unha participación inferior ao 80% nas actividades programadas considerárase como incumprimento de participación.