OBXECTO

O obxecto desta convocatoria é establecer unha conexión entre os traballos de fin de grao (TFG) e/ou traballos de fin de máster (TFM) do estudantado da Universidade de Vigo e os retos reais propostos por empresas, proxectos de emprendemento ou iniciativas empresariais emerxentes da nosa comunidade autónoma.

A través do Programa Colmea de Ideas, búscase que o estudantado desenvolva, aplique e demostre os coñecementos, capacidades e competencias adquiridas ao longo da súa formación académica mediante a elaboración do seu TFG ou TFM, contribuíndo con solucións ou melloras a necesidades concretas das entidades participantes.

As estadías asociadas a estes traballos terán un carácter formativo e deberán cumprir coa normativa interna da Universidade de Vigo sobre traballos de fin de estudos, así como coas cláusulas do convenio específico de colaboración asinado para tal fin.

Establécense dúas modalidades de estadías, cun máximo de 9 bolsas en cada unha delas:

• Modalidade A: está dirixida a estadías en iniciativas empresariais emerxentes ou proxectos emprendedores, tanto os vinculados á Rede de Polos de Emprendemento e apoio ao emprego da Xunta de Galicia como aqueles nados no seo da Universidade de Vigo.
• Modalidade B: destínase a estadías en empresas ou entidades xa consolidadas.

Pode solicitar a bolsa o estudantado que cumpra os seguintes requisitos:

1. Posuír nacionalidade española, nacionalidade comunitaria acreditando a residencia continuada, ou extracomunitaria acreditando a residencia legal en España no prazo de presentación de solicitudes (non é suficiente o permiso de estadía por estudos).
2. Estar matriculado na Universidade de Vigo na materia de TFG/TGM no curso 2025/2026 na data fin do prazo de presentación de solicitudes.
3. Estar rexistrado como estudante na plataforma Colmea de Ideas https://colmeadeideas.webs.uvigo.es/register?profile=student e estar seleccionado/a pola empresa promotora do proxecto elixido para desenvolvelo no marco do seu TFG/TFM ao longo do curso académico 25/26.

SOLICITUDES

1. O estudantado que solicite a bolsa deberá empregar o formulario en liña no seguinte enlace da Secretaría virtual da Universidade de Vigo https://secretaria.uvigo.gal/uv/web/bolsas/convocatorias/index “Estadías TFG/TFM en entidades da Colmea de ideas”

2. O prazo de presentación das solicitudes comeza o día seguinte de publicarse esta convocatoria e remata o 30 de setembro do 2025 (hora peninsular española).

No caso de non ter nacionalidade española, xunto coa solicitude deberá presentar:

• No caso de estudantado comunitario deberá presentar documento do Rexistro de cidadán/á da Unión Europea
• No caso de estudantado extracomunitario deberá presentar a tarxeta de identificación de estranxeiro/a na que conste o permiso de residencia (non é suficiente co permiso de estadía por estudos).

Tamén se lles poderá requirir que acheguen outra documentación que sexa necesaria para a correcta avaliación de requisitos e méritos alegados.

O feito de non achegar a documentación requirida será causa de exclusión.

OBRIGAS

Son obrigas das persoas bolseiras:

1. Contemplar, no desenvolvemento da estadía ás obrigas recollidas na normativa para a realización de Traballo Fin de Grao e Fin de Máster (aprobada no Consello de Goberno o 15 de xuño de 2016, modificada o 13 de novembro de 2018 e o 31 de outubro de 2022)
2. Cumprir os contidos das estadías seguindo as indicacións da persoa titora asignada pola entidade participante baixo a supervisión da persoa da universidade que exerza a dirección do traballo. Así mesmo deberán manter contacto co/a director/a académica e comunicarlle calquera incidencia que exista durante o desenvolvemento da estadía
3. Incorporarse á entidade na data acordada, cumprindo o horario previsto no proxecto formativo e respectando as normas de funcionamento, seguridade e prevención de riscos laborais da mesma.
4. Presentar na Sección de Axudas e Bolsas dentro do mes seguinte á finalización da estadía un documento de fin de estadía asinado polas persoas titoras na entidade e na universidade, a través do seguinte formulario