Impacto ecolóxico potencial de Eucalyptus globulus Labill. en ríos. Liberación e alcance de compostos alelopáticos.
Data de defensa | 18/11/2021 |
Titulación | Grao en Bioloxía |
Centro | Facultade de Bioloxía |
Dirección |
Titoría: Isabel María Pardo Gamundi Cotitoría: María Nuria Pedrol Bonjoch |
Tribunal |
Secretaría: Juan Pérez Fernández Presidencia: Alejandro Leonides De Carlos Villamarín Vogalía: M. Esther Barreal Modroño |
Resumo | Nos últimos anos avanzouse notoriamente no coñecemento e na dinámica de liberación de compostos alelopáticos de Eucalyptus globulus Labill., tanto volátiles como solubles en auga. Así mesmo, son abundantes os estudos sobre os efectos deste na fauna, flora e microbiota edáfica. Con todo, son poucos os que tratan os efectos potenciais do lixiviado da follaxe aportada ás augas continentais. Concretamente, descoñécese a liberación, alcance e duración potencial de ácidos fenólicos e flavonoides en ecosistemas acuáticos. Dada a súa coñecida bioactividade, esperaríanse efectos tanxibles nos recursos base das comunidades de diatomeas e invertebrados, con consecuencias na estrutura, biodiversidade, e funcionamento do ecosistema acuático. No presente traballo estúdanse dúas cabeceiras inalteradas pola acción humana do Río Oitavén (Pontevedra) mediante a adición controlada de follaxe de eucalipto e captura de compostos mediante trampas a base de carbón activo. Os resultados da extracción das trampas e análises polo método espectrofotométrico de Folin-Ciocalteu indican un aumento estatisticamente significativo no contido en compostos fenólicos potencialmente alelopáticos nas zonas impactadas (alcanzando ata os 100 m dende o punto de adición) e que perduran alomenos ata 14 días trala incorporación do material foliar. O estudo pormenorizado dos mesmos por HPLC-DAD son concluíntes da acumulación de certos ácidos fenólicos e flavonoides de reputada natureza alelopática. Palabras chave: ácidos fenólicos, augas continentais, diversidade, flavonoides, lixiviado. |