As algas mariñas e as súas aplicacións terapéuticas
| Data de defensa | 05/11/2021 |
| Titulación | Grao en Enfermaría |
| Centro | Escola Universitaria de Enfermaría Meixoeiro |
| Dirección |
Titoría: Adolfo Paradela Carreiro |
| Tribunal |
Vogalía: María del Carmen Toucedo Estévez Secretaría: Anthony Rostron Presidencia: Jacinto Luis González Oya |
| Resumo | INTRODUCCIÓN: as algas son coñecidas e utilizadas desde a antigüidade, principalmente como fonte de alimento, debido á súa riqueza en proteínas, ácidos graxos, minerais e vitaminas. Un xeito de clasificalas baséase nos tipos de pigmentos que teñen, dándolles a súa cor característica: vermellas, verdes e marróns. Na actualidade, existe un gran interese no coñecemento e aplicabilidade dos compostos bioactivos das algas, tanto a nivel terapéutico como económico, xa que son un recurso natural de fácil obtención e tamén cultivable. OBXECTIVOS: recoller e organizar información accesible sobre as actividades terapéuticas dos compostos bioactivos das macroalgas, concretamente sobre a súa actividade anticancerÍxena e antimicrobiana. MATERIAL E MÉTODOS: realizouse unha busca bibliográfica sobre os compostos bioactivos das algas e as súas aplicacións terapéuticas. RESULTADOS: creouse unha táboa que expón a seguinte información: tipo e cantidade de compostos bioactivos estudados; tipo e cantidade de algas estudadas; tipo de microorganismo, cancro ou liña celular sobre a que se basearon os estudos da actividade dos compostos bioactivos; a referencia bibliográfica do estudo ou estudos específicos da actividade do composto bioactivo obtida a través da referencia bibliográfica base; a referencia xeral que procede da busca bibliográfica base e da que se obtivo a información específica necesaria. CONCLUSIÓNS: As macroalgas máis empregadas nos estudos sobre a actividade antimicrobiana son as algas vermellas, mentres que as algas pardas son as máis empregadas nos estudos relacionados coa actividade anticanceríxena. Os polisacáridos das algas vermellas son os compostos bioactivos con maior actividade potencial contra as enfermidades infecciosas. As enfermidades infecciosas máis estudadas foron as causadas polos virus do herpes, da inmunodeficiencia humana e do dengue e por bacterias da especie Staphylococcus e a bacteria Escherichia coli. Os metabolitos secundarios das algas pardas son os compostos bioactivos con maior actividade anticanceríxena. O cancro de colon é o tipo de cancro máis estudado, seguido de cancro de mama, leucemia e cancro de pulmón. Na actualidade existen patentes relacionadas con compostos bioactivos de algas ou os seus extractos e con actividade anticanceríxena e antimicrobiana. As macroalgas son recursos naturais cun gran potencial de uso e aplicación na loita contra o cancro e as enfermidades infecciosas. Palabras chave: algas mariñas, farmacoloxía, compostos bioactivos, cancro, enfermidades infecciosas. |