Caracterización xenotípica dos xenes tanc1a e tanc1b nunha liña de peixe cebra creada con CRISPR / Cas9
| Data de defensa | 15/09/2021 |
| Titulación | Máster Universitario en Xenómica e Xenética |
| Centro | Facultade de Bioloxía |
| Dirección |
Titoría: Miguel Arenas Busto |
| Tribunal |
Secretaría: David Posada González Vogalía: Susana Magadán Mompo Presidencia: Armando Caballero Rúa |
| Resumo | Un número crecente de estudos relacionan o papel das variantes xénicas co desenvolvemento da toxicidade inducida pola radiación, un efecto secundario que sofren algúns pacientes con cancro de próstata anos despois de ser tratados con radioterapia. Os estudos de asociación de todo o xenoma (GWAS) establecen unha relación entre un locus que comprende TANC1, un xene que ten un papel na rexeneración do músculo danado e a aparición de toxicidade tardía asociada á radiación. Así mesmo, estableceuse unha relación entre a aparición de toxicidade tardía e a perda da capacidade de xerar miotubos, proceso no que se relacionou directamente coa proteína resultante da expresión do xene TANC1. O peixe cebra (Danio rerio) é un modelo óptimo para a investigación de enfermidades musculares debido á alta similitude entre o músculo humano e o músculo deste teleóste. Os xenes tanc1a e tanc1b, os dous ortólogos do xene TANC1 humano no peixe cebra, son unha oportunidade para a xeración de modelos baseados no peixe cebra para o estudo de enfermidades musculares como a toxicidade tardía asociada á radioterapia. Partindo dunha liña de peixe cebra con alteracións xenéticas producidas pola edición xenética usando a tecnoloxía CRISPR / Cas9 nos xenes tanc1a e tanc1b, preténdese xerar un modelo para o estudo desta enfermidade humana para comprender mellor a dita enfermidade e, ademais, investigar en campos como a farmacoxenética. Este traballo busca acadar a caracterización xenotípica da liña de peixe cebra xerada, de xeito que coñezamos as modificacións introducidas nos xenes tanc1a e tanc1b a través da edición xenética que se levou a cabo neles. Palabras clave: toxicidade tardía asociada á radioterapia, rexeneración muscular, TANC1, peixe cebra, CRISPR / Cas9 |