Descrición | O volume que estamos a presentar constitúe a primeira achega dunha colección de traballos lingüísticos e terminolóxicos que a Universidade de Vigo, a través da Área de Normalización Lingüística, vai poñer á disposición da comunidade universitaria e de toda a sociedade galega para contribuír nas tarefas da elaboración da lingua galega. Como a elaboración terminolóxica require a difusión e espallamento dos materiais desenvolvidos entre tódolos destinatarios interesados -na comunidade universitaria e na sociedade galega en xeral-, acordouse poñer en marcha unha liña editorial específica no seo do catálogo de edicións do Servicio de Publicacións da Universidade de Vigo. |