Secretaría Uvigo

Dentro da aposta organizativa relativa aos escenarios de docencia mixta e de docencia en liña, a Universidade de Vigo incluíra a posta á disposición do profesorado de equipos para facilitar o uso do encerado virtual. A aposta inicial era comprar ordenadores portátiles con pantalla táctil, útiles tanto na aula física (cando a docencia sexa mixta) coma na docencia en liña se é que nalgún momento chegamos a esa situación.

Os días 16 e 17 de xullo de 2020 negociamos cos decanatos e coas direccións segundo a solución docente elixida polo centro. Naqueles centros nos que non houbo previsión de facer aula integra, non foi preciso mercar ningún equipamento específico e nos que si, os seus responsables elixiron ordenadores ou tabletas dixitalizadoras.

Petición realizada polos decanatos e polas direccións dos centros:

Noutros centros, os decanatos e as direccións pediron equipamentos para a aula ou non realizaron ningunha solicitude relacionada coas aulas integra. A Escola Superior de Enxeñaría Informática preferiu recibir cartos e buscar unha solución propia.

A compra de ordenadores e de tabletas estará rematada esta semana. Os ordenadores estarán dispoñibles a partir deste venres e as tabletas a partir da vindeira semana.

O profesorado que imparte docencia no primeiro cuadrimestre nas facultades e nas escolas citadas na táboa recibirá un correo cun aviso de cando pode pasar recoller o equipo na súa respectiva conserxería e coas indicacións para instalar o software. Os equipos chegarán con Windows 10 instalado.

O persoal con vinculación permanente poderá quedar cos ordenadores ou coas tabletas este curso e o que vén. Para o profesorado non fixo, entregaranse equipos no centro para o seu uso compartido. Estes equipos utilizaraos no segundo cuadrimestre o profesorado que imparta esa docencia.

Está en marcha a compra de máis equipos para o segundo cuadrimestre e esperamos tela rematada no mes de novembro. De novo, repartiranse nos centros en función das solicitudes recibidas.

Aproveitamos a ocasión para agradecervos o voso esforzo en toda esta etapa tan complicada e para desexarvos que esteades ben.

O equipo de goberno