Consideracións antes de matricularse en Bioinformática: https://darwin.uvigo.es/docencia/binf2223/matricula.html
Con esta materia preténdese proporcionar ao alumnado unha primeira aproximación á bioinformática actual. O enfoque non consistirá en ofrecer unha panorámica das diversas temáticas que a bioinformática contempla na actualidade, o que, por necesidade, implicaría unha abordaxe demasiado superficial. Pola contra, tras unha breve panorámica da bioinformática, centrarémonos principalmente na identificación de variantes xenómicas a partir de datos de secuenciación masiva, ademais do estudo da expresión xénica e do microbioma a partir deste mesmo tipo de datos. Por unha banda, a análise de datos de secuenciación masiva é actualmente extremadamente popular e transversal en múltiples áreas da bioloxía. Por outra banda, para realizar con fiabilidade este tipo de análises, o estudante debe adquirir previamente unha serie de conceptos e competencias transversais que lle facilitarán moito a posterior aprendizaxe doutros aspectos da bioinformática.
IMPORTANTE: en todas as sesións da materia é fundamental o uso dun ordenador portátil con capacidade para conectarse a internet vía Wi-Fi. Aqueles estudantes que teñan problemas para cumprir este requisito poden acudir ao decanato para levar en préstamo un ordenador portátil.
As metodoloxías didácticas consistirán nunha actividade de iniciación, leccións maxistrais, resolución de problemas na aula e fóra dela, prácticas na aula de informática e uso do foro na plataforma moovi.
Ademais da comunicación asíncrona co profesor a través da plataforma moovi, en calquera momento o alumnado pode concertar unha titoría virtual ou presencial co profesor a través do correo electrónico ou de forma presencial.
Para obter a cualificación, o estudante debe cargar unha foto na plataforma da materia moovi.
(*) Tema do programa English Friendly.
Os estudantes internacionais poderán solicitar ao profesorado: a) materiais e referencias bibliográficas para seguir a materia en inglés, b) asistir a titorías en inglés, c) probas e avaliacións en inglés.
