Esta materia céntrase no estudo das unidades sintácticas superiores (frases, cláusulas e oracións) e a súa tipoloxía así como nas relacións que se dan entre elas para conformar unidades textuais superiores. Afóndase na análise sintáctica argumentada, partindo do verbo como núcleo predicativo da cláusula e as relacións que establece cos outros constituíntes funcionais e as implicacións semánticas e pragmáticas que diso derivan. Préstase atención ós elementos de relación interoracionais (conxuncións) e supraoracionais (marcadores discursivos). Desde unha vertente aplicada, trabállase a redacción de diferentes tipos de textos, facendo especial énfase na súa corrección sintáctica e no uso de construcións diferenciais galegas.
