Secretaría Uvigo

O CISUG e as tres universidades galegas asinan os primeiros acordos transformativos con Cambrigde University Press e Oxford University Press para ler e publicar en acceso aberto

A Vicerreitoría de Investigación informa que a Universidade de Vigo ven de asinar a través do Consorcio Interuniversitario do Sistema Universitario de Galicia (CISUG) os seus primeiros acordos transformativos con Cambridge University Press e Oxford University Press.

Este novo tipo de acordos con editoriais científicas van dirixidos a transformar o modelo de pago de licenzas por “ler” ao pago de licenzas por “ler e publicar” en acceso aberto. Así, ademais do acceso ás revistas do editor, inclúese o pago dos custos de procesamento de artigos ou APCs (Article Processing Charges) para aqueles autores e autoras da universidade que desexen publicar os seus traballos en acceso aberto.

Os acordos inscríbense no marco do apoio á Ciencia Aberta (Open Science) e o seu obxectivo final é acelerar a transición cara o acceso aberto (OA), facilitar o cumprimento dos requirimentos das axencias financiadoras e incrementar a visibilidade da investigación.

A Biblioteca Universitaria será a encargada de xestionar as solicitudes e ofrecerá soporte e asesoramento.

Estarán dispoñibles guías que recollen as características do acordo, o procedemento a seguir e os requirimentos para beneficiarse destas axudas.

Ademais, habilitouse un correo-e para resolver consultas: accesoaberto.biblioteca@uvigo.es