O alumno disporá
de dúas convocatorias para superar a materia: a convocatoria ordinaria e a
extraordinaria. Na convocatoria ordinaria, contémplanse dúas opcións para
superar a materia: mediante avaliación continua ou mediante un exame final
(exame ordinario) que incluirá todos os contidos da materia. En caso de
suspender a primeira convocatoria, o alumno poderá superar a materia superando
o exame extraordinario, que igualmente incluirá todos os contidos da materia. Empregarase un
sistema de cualificación numérico con valores de 0 a 10 puntos, segundo a
lexislación vixente (R.D. 1125/2003 de 5 de setembro, B.O.E. nº 224 de 18 de
setembro). Convocatoria
ordinaria: avaliación continua O método de
avaliación continua (EC) valorará os resultados acadados polos alumnos nas
diferentes actividades realizadas ao longo do curso, agrupándose en cinco
partes: Proba final (PF), Probas parciais (PP), Memorias de prácticas (MP),
Exercicios Avaliables (EE), e Traballo en grupo (TG). A nota de cada parte
calcularase como a media aritmética dos ítems realizados ata o momento da
avaliación nesa parte. Realizaranse dúas
probas parciais (PP) ao longo do curso Estas probas de avaliación continua
intercalaranse coas sesións de teoría. O alumno deberá presentar unha memoria
por cada práctica de laboratorio sempre que así se indique na realización da
mesma, que serán avaliadas no ítem MP. Nas horas de seminario e/ou de clase
teórica poderáselle propoñer ao alumno a realización e entrega de diferentes
exercicios, que serán avaliados no ítem EE. No caso de que algún alumno non
poida asistir a unha sesión na que se realicen exercicios avaliables por causa
de forza maior, este deberá avisar por correo electrónico aos profesores para
que se teña rexistro e esta circunstancia se teña en conta no momento da
avaliación. Ademais, os alumnos deberán realizar e expoñer un traballo en grupo
sobre o deseño dun mecanismo (práctica de laboratorio PL5) que será avaliado no
ítem TG. A proba final de avaliación continua (PF) incluirá todos os contidos
da materia. A nota da
avaliación continua (NEC) será o resultado de aplicar a media aritmética
ponderada da nota de cada unha das partes (PF, PP, MP, EE e TG), segundo se
reflicte a continuación: NEC = 0,40 PF +
0,15 PP1 + 0,15 PP2 + 0,10 MP + 0,10 EE + 0,10 TG Para aprobar a
materia por avaliación continua, deberanse cumprir tres condicións: i) ter
realizado todas as tarefas avaliables (salvo casos debidamente xustificados);
ii) ter unha cualificación de polo menos 4 puntos sobre 10 na proba final de
avaliación continua (PF); iii) ter un valor de NEC maior ou igual a 5. No caso
de incumprirse algunha das dúas primeiras condicións, a nota do alumno será a
mínima entre a súa NEC e 4, pasando a obter unha cualificación de suspenso na
avaliación continua da materia. Convocatoria
ordinaria: exame ordinario Aqueles alumnos
que non consigan superar a materia polo método de avaliación continua, deberán
presentarse ao exame ordinario, onde se avaliarán todas as competencias da
materia. Os resultados deste exame suporán o 100% da nota final do alumno,
sendo requisito indispensable para superar a materia obter unha cualificación maior
ou igual a 5 puntos sobre 10. Por último, cómpre sinalar que todos os alumnos
teñen a opción de mellorar a súa cualificación obtida por avaliación continua
(NEC) presentándose ao exame ordinario. Convocatoria
extraordinaria Os alumnos que
non superasen a materia na convocatoria ordinaria realizarán un exame
extraordinario que terá o mesmo formato e os mesmos requisitos que o exame
ordinario. Compromiso ético Na súa dobre
condición de militar e de estudante da Universidade de Vigo, o alumado está
suxeito ás obrigas derivadas de ambas institucións. No que se refire aos
estudantes universitarios, o Estatuto do Estudante Universitario, aprobado polo
Real decreto 1791/2010, do 30 de decembro, establece no seu artigo 12, punto
2d, que o estudante universitario ten o deber de absterse da utilización ou
cooperación en procedementos fraudulentos nas probas de avaliación, nos
traballos que se realicen ou en documentos oficiais da universidade. Así mesmo,
a LCM, no seu artigo 4 relativo ás normas de comportamento militar, establece
na súa norma décimo quinta que este cumprirá con exactitude os seus deberes e
obrigas impulsado polo sentimento de honra... Polo tanto,
espérase que o alumno teña un comportamento ético adecuado. Se se detectase un
comportamento pouco ético durante a realización de calquera proba ou exercicio
avaliable (copia, plaxio, uso de dispositivos electrónicos non autorizados ou
outros), o alumno en cuestión non superará a materia por avaliación continua
(na que obterá unha cualificación de 0,0). Así mesmo, se este tipo de
comportamento se detectase no exame ordinario ou no exame extraordinario, o
alumno obtería na citada convocatoria unha cualificación de 0,0. |