A
presente disciplina pode cursar-se, na primeira convocaçom anual, em regime de avaliaçom contínua (em que se valorizará fundamentalmente a aquisiçom de
competência tradutiva e a participaçom regular e ativa nas aulas) ou de avaliaçom final (exame único).
No entanto, na convocaçom de julho só é possível o regime de avaliaçom final
(exame oficial).

Na primeira convocaçom
anual, entende-se que um aluno opta polo regime de avaliaçom contínua (o mais
recomendável nesta disciplina!) quando realiza algumha das atividades da
avaliaçom contínua (prova teórico-prática, encomenda de traduçom individual,
trabalho em equipa). Para superar a avaliaçom contínua, o aluno deverá obter o aprovado na média
aritmética ponderada das classificaçons na prova teórico-prática inicial (30%
da classificaçom global), na encomenda de traduçom individual (40%) e no
trabalho em equipa (30%); nom
obstante, no caso de a média aritmética ponderada das classificaçons na prova
teórico-prática inicial e na encomenda de traduçom individual ser inferior a
4,9 pontos, a classificaçom global será, no máximo, de 4,9 pontos. Os alunos que nom superarem a avaliaçom contínua mediante as atividades
referidas deverám realizar o exame oficial da convocaçom de julho ou acolherem-se
aos regimes de avaliaçom de sucessivas convocaçons. (A prova teórico-prática
inicial será realizada durante a quarta semana letiva de novembro, a encomenda
de traduçom individual será lançada na segunda semana de dezembro e o trabalho em equipa será exposto e entregado a 13 de
janeiro).

O exame oficial da disciplina (convocaçons de dezembro [segunda semana de dezembro] e julho [data, hora e lugar estabelecidos polo Decanato]) consta de
umha parte teórico-prática a redigir em galego (40% da classificaçom numha média
aritmética ponderada) e de outra prática (60%), a qual consiste na traduçom
para galego, a realizar no prazo de vários dias no quadro de umha encomenda de
traduçom, de um texto pragmático
redigido em inglês.