Educational guide 2014_15 Facultade de Filoloxía e Tradución

Literatura e identidade cultural do primeiro idioma estranxeiro: Inglés

Avaliación

	Descrición	Cualificación
Presentacións/exposicións	Presentación oral sobre un dos textos literarios do temario. A presentación será preferibelmente individual, aínda que en función do número de estudantes poderá realizarse en grupo (máximo de 3 persoas).	20
Traballos e proxectos	Un ensaio consistente no comentario crítico dun texto literario ou fílmico proposto pola profesora no que o alumnado deberá aplicar os conceptos teóricos estudados nas aulas, empregando o vocabulario específico e a terminoloxía crítica, identificando os recursos formais e aspectos estilísticos relevantes e axeitándose ás normas académicas de elaboración de traballos científicos. Na avaliación do traballo teranse en conta tanto as competencias relacionadas cos contidos teóricos coma as relacionadas coa construción de argumentos sólidos e a súa correcta expresión escrita.	20
Probas de resposta longa, de desenvolvemento	Haberá un primeiro exame parcial ao final do primeiro bloque de contido (África). Para eliminar materia é imprescindíbel obter como mínimo un 4 neste parcial (ver Outros comentarios).	30
Probas de resposta longa, de desenvolvemento	Haberá un exame parcial ao final do segundo bloque de contido (Diáspora africana), aproximadamente na última semana de aulas.	30

Outros comentarios sobre a Avaliación
1. PRIMEIRA EDICIÓN DE ACTAS A avaliación será continua e realizarase consonte o detallado máis arriba. É obrigatorio realizar todas as probas previstas na avaliación. As probas non realizadas contarán coma un cero. As datas das probas serán propostas pola profesora no cronograma entregado o primeiro día de aulas e serán consensuadas co alumnado e publicadas en Faitic con antelación suficiente. Se un/ha alumna/o, por causas de forza maior debidamente xustificadas, non puidese realizar algunha proba, deberá falar coa profesora para estabelecer unha nova data. A cualificación obtida en cada proba parcial computará polo 30% da cualificación final. No caso de que a cualificación da primeira proba parcial (África) non acade un 4, a/o estudante non eliminará materia e deberá realizar novamente unha proba correspondente ao bloque de África coincidindo coa data da segunda proba (Diáspora africana). A presentación oral terá lugar durante as aulas consonte a un calendario que se estabelecerá ao comezo do cuadrimestre e para a súa preparación é responsabilidade da/do estudante asistir a titorías coa profesora. As presentacións seran preferibelmente individuais, malia que existirá a posibilidade de constituír grupos (dun máximo de 3 persoas) en función do número de estudantes matriculadxs na materia. No caso das presentacións grupais, cada persoa será avaliada pola súa contribución individual. Avaliaranse tanto as competencias referidas ao coñecemento da cuestión analizada como as relacionadas coa construción de argumentos e a súa expresión oral correcta. Deberá utilizarse como apoio software de diapositivas para presentacións, e avaliarase a correcta expresión escrita nestes textos, que se lle deberán entregar á profesora na mesma data da presentación a través da plataforma de teledocencia Tema. O traballo escrito entregarase ao final do cuadrimestre, na data estabelecida no cronograma. As características deste traballo serán especificadas ao seu debido tempo a través da plataforma de teledocencia Faitic. É responsabilidade do alumnado asistir a titorías para que a profesora poida facer un seguimento da metodoloxía e desenvolvemento do traballo. Todas as probas (exames parciais, presentación oral e traballo escrito) cualificaranse tendo en conta non só a pertinencia e calidade do contido das respostas senón tamén a súa corrección lingüística e o seu rigor académico. O alumnado avaliado por este sistema non poderá presentarse ao exame correspondente á avaliación única, e a súa cualificación na primeira edición de actas corresponderá ao cómputo das notas obtidas nas probas realizadas durante o curso. Excepcionalmente, haberá unha modalidade de avaliación única na primeira edición de actas, só para aquelas/es estudantes que por motivos xustificados non poidan facer un seguimento regular da materia. Neste caso, a/o alumna/o deberá comunicarllo á profesora argumentadamente ao comezo do cuadrimestre (nas dúas primeiras semanas de clase). A avaliación constará dun exame único, baseado nos contidos da materia, que combinará preguntas teóricas e exercicios prácticos de análise e interpretación de textos e cuxa nota constituirá o 100% da cualificación final. Este exame terá lugar na mesma data ca o segundo exame parcial (ver máis arriba). A escolla desta opción en ningún caso supón a perda do dereito a asistir ás aulas sempre que sexa posíbel, o cal se recomenda encarecidamente. O alumnado que siga esta modalidade de avaliación será responsábel de manter un contacto continuado coa materia a través de Faitic. A copia ou plaxio total ou parcial en calquera tipo de traballo ou exame suporá un cero nesa proba. Alegar descoñecemento do que supón un plaxio non eximirá o alumnado da súa responsabilidade. Non é obrigatorio asistir ás aulas, aínda que se recomenda encarecidamente asistir con regularidade e participar de maneira activa no desenvolvemento do curso. É responsabilidade do alumnado facer un seguimento da materia a través de Faitic e estar ao tanto das datas de realización das probas. 2. SEGUNDA EDICIÓN DE ACTAS Na segunda edición de actas a avaliación levarase a cabo mediante un exame único, baseado nos contidos da materia, que combinará preguntas teóricas e exercicios prácticos de análise de textos e cuxa nota constituirá o 100% da cualificación final. Este exame terá lugar na data oficial de xullo aprobada pola Xunta de Facultade. Recoméndase firmemente que o alumnado asista ás aulas e titorías con regularidade e se implique activamente no seu proceso de aprendizaxe.