1. PRIMEIRA EDICIÓN DE ACTAS

Na primeira edición de actas, a avaliación realizarase consonte o detallado máis arriba. As dúas probas de avaliación parcial e finalista escritas terán lugar durante o período lectivo, en data fixada polo profesorado e mailo alumnado nas primeiras semanas de clase. Estas datas serán publicadas na plataforma de teleaprendizaxe da materia.
É obrigatorio realizar e entregar no prazo establecido todos os posibles traballos requiridos na clase. Os traballos non entregados ou entregados fóra de prazo contarán coma un cero. Do mesmo xeito, os traballos que non cumpran os requisitos mínimos de corrección lingüística e conteñan erros gramaticais graves contarán coma un cero. O plaxio total ou parcial en calquera tipo de traballo suporá un cero nese traballo.
A cualificación mínima requirida nas probas de avaliación parcial e finalista escritas será de 5 puntos sobre 10 para poder superar a materia.

Se algunha alumna/o non desexa acollerse a este sistema de avaliación, deberá comunicarllo ao profesorado ao comezo do cuadrimestre (nas dúas primeiras semanas de clase). Nese caso, poderá ser avaliada/o mediante un exame único, baseado nos contidos da materia, que combinará preguntas teóricas e exercicios prácticos e cuxa nota constituirá o 100% da cualificación final. Este exame terá lugar na data acordada polo profesorado da materia e publicada na plataforma de teledocencia. A escolla desta opción en ningún caso supón a perda do dereito a asistir ás aulas sempre que sexa posible.

2. SEGUNDA EDICIÓN DE ACTAS

Na segunda edición de actas (xullo) a avaliación levarase a cabo mediante un exame único, baseado nos contidos da materia, que combinará preguntas teóricas e exercicios prácticos e cuxa nota constituirá o 100% da cualificación final. Este exame terá lugar na data oficial de xullo aprobada pola Xunta de Facultade.