Guia docente 2013_14 Facultade de Filoloxía e Tradución

Análise e interpretación literaria de textos do primeiro idioma estranxeiro: Inglés

Avaliación

	Descrición	Cualificación
Traballos de aula	Avaliarase a participación e implicación individual do alumnado nas sesións presenciais, tanto nas clases maxistrais coma, moi especialmente, nas prácticas e nos debates de comentario dos textos, tanto en grupo pequeno coma en gran grupo. Valorarase non só a participación cuantitativa senón tamén a pertinencia das achegas.	20
Resolución de problemas e/ou exercicios	Probas orais e/ou escritas, individuais e/ou grupais, nas que o alumnado debe realizar exercicios de análise e comentario crítico de textos aplicando os conceptos teóricos estudados nas aulas, empregando o vocabulario específico e a terminoloxía crítica, identificando os recursos formais e aspectos estilísticos relevantes e axeitándose ás normas académicas de elaboración de traballos científicos. Estes exercicios poderanse realizar tanto presencial coma non presencialmente. Na avaliación teranse en conta a adquisición das competencias referidas tanto ao coñecemento da cuestión analizada coma á construción de argumentos e a súa correcta expresión escrita ou oral.	30
Probas de resposta longa, de desenvolvemento	Haberá dous exames parciais sobre os contidos da materia. O primeiro terá lugar ao final da unidade dedicada ao xénero da poesía. O segundo parcial celebrarase entre a penúltima e a última semana de aulas. A data concreta acordarase entre alumnado e profesora con antelación suficiente. As cualificacións obtidas en ambos os parciais farán media aritmética e o resultado constituirá o 50% da cualificación final da materia.	50

Outros comentarios sobre a Avaliación
1. PRIMEIRA EDICIÓN DE ACTAS 1.1. Avaliación para o alumnado que asiste regularmente ás aulas (opción recomendada) A avaliación do alumnado que asiste regularmente ás aulas realizarase consonte o detallado máis arriba. A asistencia ás aulas será verificada mediante a sinatura no parte diario de asistencia. É obrigatorio realizar e, no seu caso, entregar no prazo estabelecido todos os traballos asignados durante o desenvolvemento das aulas. Os traballos non entregados ou entregados fóra de prazo contarán coma un cero. Do mesmo xeito, os traballos que non cumpran os requisitos mínimos de corrección lingüística e conteñan erros gramaticais graves contarán coma un cero. A non realización dun exame parcial suporá un cero. Se un/ha alumna/o, por motivos xustificados con anterioridade á proba, non se puidese presentar á primeira proba parcial, deberá realizar as dúas probas parciais na data correspondente á segunda proba. A cualificación obtida computará polo 50% da cualificación final. O alumnado avaliado por este sistema non poderá presentarse ao exame correspondente á avaliación única (ver apartado 1.2.), e a súa cualificación na primeira edición de actas corresponderá ao cómputo das notas obtidas nas probas realizadas durante o curso. A copia ou plaxio total ou parcial en calquera tipo de traballo ou exame suporá un cero nesa proba. Alegar descoñecemento do que supón un plaxio non eximirá o alumnado da súa responsabilidade. 1.2. Avaliación única Se algunha alumna/o non pode asistir ás aulas con regularidade por motivos xustificados, deberá comunicarllo á profesora argumentadamente ao comezo do cuadrimestre (nas dúas primeiras semanas de clase). Nese caso, será ser avaliada/o mediante un exame único, baseado nos contidos da materia, que combinará preguntas teóricas e exercicios prácticos de análise e interpretación de textos e cuxa nota constituirá o 100% da cualificación final. Este exame terá lugar na mesma data ca o segundo exame parcial (ver máis arriba), data que será acordada entre profesora e alumnado e comunicada a través de Faitic con antelación suficiente. A escolla desta opción en ningún caso supón a perda do dereito a asistir ás aulas sempre que sexa posíbel, o cal se recomenda encarecidamente. O alumnado que siga esta modalidade de avaliación será responsábel de manter un contacto continuado coa materia a través de Faitic. 2. SEGUNDA EDICIÓN DE ACTAS Na segunda edición de actas (xullo) a avaliación levarase a cabo mediante un exame único, baseado nos contidos da materia, que combinará preguntas teóricas e exercicios prácticos de análise de textos e cuxa nota constituirá o 100% da cualificación final. Este exame terá lugar na data oficial de xullo aprobada pola Xunta de Facultade. Recoméndase firmemente que o alumnado asista ás aulas e titorías con regularidade e se implique activamente no seu proceso de aprendizaxe.