Un dos obxectivos do Ciclo Intensivo do Programa de Maiores é ofrecerlle ao alumnado coñecementos tanto de tipo científico como cultural.
Neste campo tan amplo, a materia de “Bioloxía humana e saúde” pode aportar información complementaria ao alumnado no campo da Biomedicina xa que será un tema non abordado previamente no programa. Nesta materia tratarase o funcionamento do corpo dende o nivel celular ata unidades máis complexas como son os aparatos e sistemas, así como as patoloxías máis frecuentes asociadas a cada un deles. Así mesmo intentarase que expertos no campo asistan ás clases para impartir seminarios de temas de actualidade no campo da Biomedicina.
Trátase dunha materia cun papel fundamental na formación do alumnado, xa que para a meirande parte será a máis relacionada coa saúde da que disfrutarán en todo o programa. Por tanto, debe ter un carácter básico entanto á profundidade de coñecementos, pero de amplo contido global.