A materia ten como obxectivo desenvolver un marco de referencia definido polos Estudos Culturais. Pretendemos reflexionar sobre os procesos de produción, circulación e consumo do deseño, así como as súas transformacións históricas e a súa inserción na actualidade.
Preténdese iniciar no estudantado unha reflexión conceptual sobre a praxe do deseño, que permita coñecer, explicar e interpretar o campo, as súas prácticas e os propios obxectos de deseño.
Con este fin farase uso de diferentes tradicións disciplinarias como a antropoloxía, socioloxía, historia social, historia das ideas e dos obxectos, e a semiótica. Esta perspectiva permitirá ao alumnado desenvolver unha lectura crítica do deseño como práctica e disciplina.
A través de actividades de lectura, discusión e análise de estudos de caso ofreceranse claves de interpretación para comprender a figura do deseñador tanto no seu percorrido histórico como na súa relación co contexto cultural e social. Os temas que se abordarán inclúen os ámbitos do deseño e a moda entendidos como práctica cultural.
