A materia fornece estratexias xerais de lectura, así como pautas específicas para aplicar á interpretación e análise de textos literarios de natureza diversa. Está orientada a favorecer o desenvolvemento de destrezas comunicativas mediante a práctica da lectura, a escritura e a expresión oral, así como a expor ao alumnado ao reto emocional e intelectual que supón enfrontarse a textos heteroxéneos tanto no que respecta á súa tipoloxía diversa, á súa temática variada ou á súa pertenza a xéneros e estéticas diferentes. Ademais da introdución ao vocabulario específico e á terminoloxía crítica e da identificación dos recursos formais e aspectos estilísticos relevantes, a materia persegue formar ao alumnado para que desenvolva o seu espírito crítico ante a lectura dun texto literario de xeito que poida responder combinando a súa capacidade de interpretación persoal e creativa cun discurso crítico informado e rigoroso.